కొత్తపల్లి జయశంకర్ (Kothapalli Jayashankar)

కొత్తపల్లి జయశంకర్
జననం	ఆగస్టు 6, 1934
స్వస్థలం	అక్కంపేట (వరంగల్‌ జిల్లా)
పదవులు	కాకతీయ విశ్వవిద్యాలయం విసి,
మరణం	జూన్21, 2011

తెలంగాణ సిద్ధాంతకర్తగా పేరుపొందిన కొత్తపల్లి జయశంకర్ ఆగస్టు 6, 1934న వరంగల్‌ జిల్లా ఆత్మకూరు మండలం అక్కంపేటలో జన్మించారు. బనారస్‌, అలీగఢ్‌ విశ్వవిద్యాలయాలనుంచి ఆర్థికశాస్త్రంలో పట్టా అందుకున్న జయశంకర్‌ ఉస్మానియా విశ్వవిద్యాలయంలో పీహెచ్‌డీ చేశారు. 1975 నుంచి 1979 వరకు వరంగల్‌ సీకేఎం ప్రిన్సిపాల్‌గా, 1979 నుంచి 1981 వరకు కేయూ రిజిస్ట్రార్‌గా, 1982 నుంచి 1991 వరకు సీఫెల్‌ రిజిస్ట్రార్‌గా, 1991 నుంచి 1994 వరకు కాకతీయ విశ్వవిద్యాలయం ఉపకులపతిగా పనిచేశారు. తెలంగాణ ఉద్యమానికే తన జీవితాన్ని అంకితం చేసి ఆజన్మ బ్రహ్మచారి గా మిగిలిపోయారు. తెలంగాణ సిద్ధాంతకర్తగా పేరుపొందడమే కాకుండా ప్రత్యేక తెలంగాణ రాష్ట్ర ఏర్పాటుకై అవతరించిన తెలంగాణ రాష్ట్ర సమితి పార్టీకి సిద్ధాంతరూపం ఇచ్చిన ప్రముఖుడిగా జయశంకర్ పేరుపొందారు. తెలంగాణపై పలు గ్రంథాలు రచించడమే కాకుండా తెలంగాణ వెనకబాటుకు సిద్ధాంతపరంగా పరిశొధనలు చేసి ఎత్తిచూపారు. జూన్21, 2011న జయశంకర్ మరణించారు.

తెలంగాణ ఉద్యమంలో:
1969 తెలంగాణా ఉద్యమంలో జయశంకర్ చురుగ్గా పాల్గొన్నారు. 1952 లో జయశంకర్ నాన్ ముల్కీ ఉద్యమంలో, సాంబార్, ఇడ్లీ గోబ్యాక్ ఉద్యమంలో పాల్గొన్నారు. తెలంగాణ, ఆంధ్ర రాష్ట్రాల విలీనాన్ని వ్యతిరేకిస్తూ విద్యార్థి నాయకుడిగా ఆయన 1954 లో ఫజల్ అలీ కమిషన్‌కు నివేదిక ఇచ్చారు. కె.సి.ఆర్.కు సలహాదారుగా, మార్గదర్శిగా తోడ్పాటు అందించారు. తెలంగాణా రాష్ట్ర ఏర్పాటు ఆవశ్యకతపై ఆయన పలు పుస్తకాలు రచించారు. తెలంగాణలోనే కాకుండా దేశంలోని ఇతర ప్రాంతాల్లో, విదేశాల్లో తెలంగాణ రాష్ట్ర ఏర్పాటు ఆవశ్యకత గురించి ప్రసంగాలు చేశారు. జయశంకర్ తన ఆస్తిని, జీవితాన్ని తెలంగాణ కోసం అంకితం చేశాడు. "నాకు ఒకే ఒక కోరిక మిగిలింది. తెలంగాణ రాష్ట్ర ఏర్పాటు కళ్ళారా చూడాలి, తర్వాత మరణించాలి" అని అనేవారు.

విభాగాలు: వరంగల్ జిల్లా ప్రముఖులు, ఆత్మకూరు మండలం, కాకతీయ విశ్వవిద్యాలయం, 1934లో జన్మించినవారు, 2011లో మరణించినవారు,

 = = = = =