కల్లూరి సుబ్బారావు (Kalluru Subbarao)

కల్లూరి సుబ్బారావు (1897-1973) జననం మే 25, 1897 స్వగ్రామం కల్లూరు జిల్లా అనంతపురం రంగం స్వాతంత్ర్యోద్యమం, రచనలు, రాజకీయాలు, మరణం డిసెంబర్ 21, 1973 కల్లూరి సుబ్బారావు అనంతపురం జిల్లాకు చెందిన స్వాతంత్ర్య సమరయోధుడు, పండితుడు మరియు రాజకీయ నాయకుడు. అనంతపురం జిల్లా హిందూపురానికి సమీపంలోని కల్లూరు గ్రామంలో మే 25, 1897న జన్మించిన సుబ్బారావు మదనపల్లెలోని జాతీయ కళాశాలలో 12వ తరగతి వరకు చదువుకున్నారు. 17 ఏళ్ల వయసులో అనీబిసెంట్ ప్రసంగాన్ని విని, ఉత్తేజితుడై, జాతీయోద్యమంలో పాల్గొనటం ప్రారంభించారు. 1920లో జరిగిన ఆంధ్రమహాసభలో పాల్గొని, అయ్యదేవర కాళేశ్వరరావు , దుగ్గిరాల గోపాలకృష్ణయ్య లతో స్నేహం పెంపొందించుకున్నారు. 1921లో విజయవాడలో జరిగిన అఖిలభారత కాంగ్రెసు సమావేశాల్లో స్వచ్ఛందసేవకునిగా పనిచేశారు. అనేక పర్యాయాలు జైలుకు వెళ్ళి, మొత్తం ఏడేళ్ల పాటు జైలు శిక్షను అనుభవించారు. రాయలసీమలోనే తొలి రాజకీయ ఖైదీగా పేరుపొందారు. ఆంగ్లేయులు ఈయన్ను కాంగ్రెస్ పులి అని అభివర్ణించేవారు. ఇతను 1924లో లోకమాన్య అనే పత్రికకు సంపాదకత్వం వహించారు. స్వాతంత్ర్యం తర్వాత సుబ్బారావు మద్రాసు రాష్ట్ర శాసనసభకు ఎన్నికయ్యారు. 1955లో ఆంధ్రరాష్ట్ర శాసనసభకు హిందూపూర్ ద్విసభ్య నియోజకవర్గం నుంచి శాసనసభ్యుడిగా ఎన్నికైనారు. 1955లో నల్లపాటి వెంకటరామయ్య స్పీకరుగా ఉన్నప్పుడు శాసనసభ డిప్యూటీ స్పీకరుగా కూడా పనిచేశారు. నీలం సంజీవరెడ్డి రాజకీయ గురువుగా పేరుపొందిన సుబ్బారెడ్డి ఆంధ్రప్రదేశ్ పీసిసి కార్యదర్శిగా కూడా పనిచేశారు. శ్రీబాగ్ ఒప్పందంపై సంతకం చేసిన రాయలసీమ ప్రముఖులలో కల్లూరి సుబ్బారావు ఒకరు. 1967లో భారత ప్రభుత్వం ఈయనను పద్మశ్రీ పురస్కారంతో సత్కరించింది. రాయలసీమ కురువృద్ధుడిగా ప్రసిద్దిచెందిన కల్లూరి సుబ్బారావు 1973, డిసెంబర్ 21న మరణించారు. విభాగాలు: అనంతపురం జిల్లా ప్రముఖులు, హిందూపూర్ అసెంబ్లీ నియోజకవర్గం,   = = = = = సంప్రదించిన గ్రంథాలు, వెబ్‌సైట్లు: తెలుగు వికీపీడియా, ఆంగ్ల వికీపీడియా, భారత స్వాతంత్ర్య సంగ్రామంలో తెలుగుయోధులు, (ఆంధ్రప్రదేశ్ ఫ్రీడం ఫైటర్స్ కల్చరల్ కమిటీ ప్రచురణ, 2006), అనంతదర్శిని (2000 ముద్రణ),