చండ్ర రాజేశ్వరరావు (Chandra Rajeshwar Rao)

చండ్ర రాజేశ్వరరావు (1914-1994) జననం జూన్ 6, 1914 స్వస్థలం మంగళాపురం పదవులు సీపీఐ జాతీయ ప్రధాన కార్యదర్శి (1974-92) మరణం ఏప్రిల్ 9, 1994 స్వాతంత్ర్య సమరయోధుడు, తెలంగాణ సాయుధ పోరాట యోధుడు, కమ్యూనిస్టు నాయకుడు చండ్ర రాజేశ్వరరావు జూన్ 6, 1914న కృష్ణా జిల్లా మంగళాపురం గ్రామంలో జన్మించారు. ఉన్నత విద్యకై బనారస్ విశ్వవిద్యాలయం వెళ్ళారు. అక్కడ ఉన్నపుడే కమ్యూనిస్టు పార్టీ వైపు ప్రభావితులైనారు. కృష్ణా జిల్లా కమ్యూనిస్టు పార్టీ కమిటి కార్యదర్శిగా, రాష్ట్ర కమ్యూనిస్టు పార్టీ కార్యదర్శిగా, కేంద్ర కమ్యూనిస్టు పార్టీ సభ్యుడిగా, పోలిట్ బ్యూరో సభ్యుడిగా, 1964లో కమ్యూనిస్టు పార్టీ చీలిక అనంతరం సీపీఐ జాతీయ ప్రధాన కార్యదర్శిగా పదవులు పొందారు. 28 సంవత్సరాలకు పైగా భారతీయ కమ్యూనిస్టు పార్టీ (సి.పి.ఐ.)కి జాతీయ ప్రధాన కార్యదర్శిగా ఉండి 1992లో ఆనారోగ్యకారణాల వల్ల విరమించుకున్నారు. సంపన్న రైతు కుటుంబంలో జన్మించిననూ తాడిత, పీడిత ప్రజాసమస్యలకై కృషిచేశారు. జాతీయ స్థాయిలోనే కమ్యూనిస్టు నాయకుడిగా పేరుపొందారు. అంతర్జాతీయ స్థాయి కమ్యూనిస్టు సమావేశాలకు కూడా పలుసార్లు హాజరయ్యారు. అంతర్జాతీయ కమ్యూనిస్టు దృక్పథంతో సామ్రాజ్యవాద వ్యతిరేక ఉద్యమాలను, శాంతి ఉద్యమాలను ముందుకు తీసుకెళ్ళినందుకు రాజేశ్వరరావును `ఆర్డర్‌ ఆఫ్‌ లెనిన్‌' అవార్డు తో సోవియట్‌ యూనియన్‌, `ఆర్డర్‌ ఆఫ్‌ డెమిట్రోవ్‌' అవార్డుతో బల్గేరియా, అలాగే చెకోస్లోవేకియా, మంగోలియా దేశాలు అవార్డులతో సత్కరించాయి. రాజేశ్వరరావు అనారోగ్యంతో బాధపడుతూ ఏప్రిల్ 9, 1994న మరణించారు. ఆయన స్మారకార్ధం హైదరాబాదు శివార్లలోని కొండాపూర్‌ లో ఉన్న చండ్ర రాజేశ్వరరావు‌ ఫౌండేషన్‌ లో కాంశ్య విగ్రహాన్ని ఆవిష్కరించారు. విభాగాలు: ఆంధ్రప్రదేశ్ కమ్యూనిస్టు నాయకులు,  కృష్ణా జిల్లా రాజకీయ నాయకులు,   = = = = = సంప్రదించిన గ్రంథాలు, వెబ్‌సైట్లు: స్వాతంత్ర్య సమరంలో కమ్యూనిస్టు దేశభక్తులు (సంపాదకులు- పరకాల పట్టాభిరామారావు), తెలుగు పెద్దలు (రచన- మల్లాది కృష్ణానంద్),