కె.ఎం.మున్షీ (K.M.Munshi)

కె.ఎం.మున్షీ జననం డిసెంబరు 30, 1887 స్వస్థలం బారుచ్ నిర్వహించిన పదవులు కేంద్రమంత్రి, ఉత్తరప్రదేశ్ గవర్నరు, మరణం ఫిబ్రవరి 8, 1971 స్వాతంత్ర్య సమరయోధునిగా, రాజకీయ నాయకుడిగా, రచయితగా ప్రసిద్ధిచెందిన కన్నయలాల్ మాణిక్‌లాల్ మున్షీ డిసెంబరు 30, 1887న ఇప్పటి గుజరాత్ రాష్ట్రంలోని బారుచ్‌లో జన్మించారు. బారుచ్, వడోదరలలో అభ్యసించి జాతీయోద్యమంలో ప్రవేశించారు. 1937లో బొంబాయి రాష్ట్ర మంత్రిగా పదవి నిర్వహించారు. 1948లో భారత ప్రభుత్వం తరఫున హైదరాబాదు రాజ్యానికి దూతగా వచ్చి సమస్యను పరిష్కరించి ప్రఖ్యాతిచెందారు. ఆ తర్వాత కేంద్రమంత్రిగా, ఉత్తరప్రదేశ్ గవర్నరుగా పనిచేశారు. సాహితీవేత్తగా రాణిస్తూ భారతీయ విద్యాభవన్‌ను ప్రారంభించారు.  ఫిబ్రవరి 8, 1971న 83 సంవత్సరాల వయస్సులో మున్షీ మరణించారు. బాల్యం, అభ్యసనం: హైస్కూల్ విద్యవరకు స్థానికంగా బారుచ్‌లోనే అభ్యసించి ఆ తర్వాత వడోదర (బరోడా) వెళ్ళారు. అక్కడ అరవిందఘోష్ ఆచార్యుడు. ఆయన ప్రభావం మరియు బరోడా పాలకుడు షయాజీరావ్ గైక్వాడ్ ప్రభావం వల్ల మున్షీ జాతీయోధ్యమంలో ప్రవేశించాడు. అంతేకాకుండా మహాత్మాగాంధీ, సర్దార్ పటేల్‌, భులాభాయ్ దేశాయ్‌లు కూడా ఆ ప్రాంతానికే చెందిన వారు కావడంతో స్వాతంత్ర్యోద్యమంపై బలమైన ముద్రపడింది. అదే సమయంలో రచయితగా, న్యాయవాదిగా కూడా మున్షీ రాణించారు. రాజకీయ ప్రస్థానం: 1937లోనే అవిభక్త ముంబాయి రాష్ట్ర శాసనసభకు ఎన్నికైన మున్షీ హోంశాఖ మంత్రిపదవిని పొందారు. సంస్థానాల విలీనీకరణ సమయంలో మొండికేసిన హైదరాబాదు నిజాంపై చర్యలు తీసుకోవడానికి భారతప్రభుత్వ దూతగా వచ్చిన మున్షీ సమస్యను చక్కగా పరిష్కరించి ప్రసిద్ధిచెందారు. భారత రాజ్యాంగ రచనలో కూడా భాగస్వాములైనారు. ఆ తర్వాత జవహార్‌లాల్ నెహ్రూ మంత్రివర్గంలో ఆహార్-వ్యవసాయ శాఖ మంత్రిగా, ఉత్తరప్రదేశ్ గవర్నరుగా పనిచేశారు. చివరిదశలో కాంగ్రెస్ పార్టీ నుంచి బయటకు వచ్చి రాజగోపాలచారితో కల్సి స్వతంత్రపార్టీని స్థాపించారు. విభాగాలు: గుజరాత్ రాష్ట్ర రాజకీయ నాయకులు, స్వాతంత్ర్య సమరయోధులు, కేంద్రమంత్రులు, ఉత్తరప్రదేశ్ గవర్నర్లు, 1887లో జన్మించినవారు, 1971లో మరణించినవారు,  = = = = =