మల్లు స్వరాజ్యం (Mallu Swarajyam)

మల్లు స్వరాజ్యం జననం 1931 స్వస్థలం కరివిరాల (నల్గొండ జిల్లా) రంగం తెలంగాణ సాయుధ పోరాటం, రాజకీయాలు, తెలంగాణ సాయుధ పోరాట యోధురాలు మల్లు స్వరాజ్యం నల్గొండ జిల్లా సూర్యాపేట తాలూకా కరివిరాల గ్రామంలో 1931లో జన్మించింది. సోదరునితో పాటు తెలంగాణ సాయుధ పోరాటంలో పాలుపంచుకొని సహచరుడు మల్లు వెంకట నరసింహారెడ్డీని వివాహం చేసుకొంది. మల్లు స్వరాజ్యం వరంగల్, కరీంనగర్, ఆదిలాబాద్ జిల్లాలో గిరిజనులను మేల్కొల్పింది. ఈమె జానపద బాణీల్లో పాటలు కట్టి స్వయంగా పాడి గ్రామాలలోని ప్రజలను ఆకట్టుకునేది. పోరాటం అంతమైన పిదప రాజకీయాలలో ప్రవేశించి 2 సార్లు శాసనసభకు ఎన్నికైనది. వామపక్ష భావాలతో, స్త్రీల ఆధ్వర్యంలో మొదలైన పత్రిక 'చైతన్య మానవి' సంపాదకవర్గంలో ఈమె ఒకరు. సాయుధ పోరాటం: మల్లు స్వరాజ్యం నిజాం సర్కారుకు ముచ్చెమటలు పట్టించి, రజాకార్ల పాలిటి సింహస్వప్నమై నిలిచింది. 1945-48 సంవత్సరాల్లో సాయుధ పోరాటాల్లో క్రియాశీలక పాత్ర పోషించి నైజాం సర్కారును గడగడలాడించింది. సాయుధ పోరాటంలో సహచరుడైన మల్లు వెంకట నరసింహారెడ్డిని వివాహం చేసుకున్న ఈమె పోరాటాల ధాటికి తట్టుకోలేక 1947-48లో ఈమె ఇంటిని పూర్తిగా దగ్ధం చేశారు. ఆమెను పట్టుకున్నవారికి బహుమతి ఇస్తామని కూడా అప్పటి ప్రభుత్వం ప్రకటించింది. రాజకీయ ప్రస్థానం: హైదరాబాదు సంస్థానం విమోచన అనంతరం ఈమె నల్గొండ జిల్లా తుంగతుర్తి అసెంబ్లీ నియోజకవర్గం నుండి 1978, 1983లలో రెండు పర్యాయాలు సి.పి.ఐ.(ఎం)పార్టీ తరఫున ఎన్నికైంది. రాష్ట్ర మహిళా సంఘం ప్రధాన కార్యదర్శిగానూ పనిచేశారు. కుటుంబం: నల్లగొండకు చెందిన ప్రముఖ సాహితీవేత్త, తెలంగాణా యోధుడు, పార్లమెంటేరియన్ భీమిరెడ్డి నరసింహారెడ్డి ఈమెకు సోదరుడు. భర్త మల్లు వెంకట నరసింహారెడ్డి కూడా సాయుధ పోరాటయోధుడు. స్వరాజ్యం కూతురు కరుణ 2009లో ప్రజారాజ్యం పార్టీ తరఫున నల్గొండ లోకసభ స్థానంలో పోటీచేసి ఓడిపోయింది. ఇవి కూడా చూడండి: విభాగాలు: నల్గొండ జిల్లా సమరయోధులు, నల్గొండ జిల్లా రాజకీయ నాయకులు, తుంగతుర్తి అసెంబ్లీ నియోజకవర్గం, 1931లో జన్మించినవారు,  = = = = = సంప్రదించిన గ్రంథాలు, వెబ్‌సైట్లు: స్వాతంత్ర్యోద్యమంలో తెలుగు మహిళలు (రచన: వాసా ప్రభావతి), స్వాతంత్ర్య సమరంలో తెలంగాణ ఆణిముత్యాలు (రచన: మల్లయ్య),