ఎం.కరుణానిధి (M. Karunanidhi)

జననం జూన్ 3, 1924 రంగం రాజకీయాలు పార్టీ ద్రవిడ మునేట కజగం (DMK) పదవులు 5 సార్లు తమిళనాడు ముఖ్యమంత్రి మరణం ఆగస్టు 7, 2018 ప్రముఖ రాజకీయ నాయకుడిగా పేరుపొందిన ముత్తువేల్ కరుణానిధి జూన్ 3, 1924న తమిళనాడులోని తిరుకువలైలో జన్మించారు. కలైనర్‌గా ప్రసిద్ధి చెందిన కరుణానిధి ఓటమి లేకుండా 13 సార్లు శాసనసభ్యుడిగా ఎన్నిక కావడమే కాకుండా 5 సార్లు ముఖ్యమంత్రిగా పదవి పొందారు. ప్రారంభంలో స్క్రీన్ రైటర్‌గా జీవనం ఆరంభించి, రాజకీయాలలో ప్రవేశించి శాసనసభ్యుడిగా, మంత్రిగా, పార్టీ అధ్యక్షుడిగా, ముఖ్యమంత్రిగా పదవులు పొంది మరణించేవరకు తమిళనాట తిరుగులేని నేతగా అవతరించారు. రచయితగా కరుణానిధి 100కు పైగా పుస్తకాలు కూడా రచించారు. సుధీర్ఘకాలం రాజకీయాలలో కొనసాగిన కరుణానిధి ఆగస్టు 7, 2018న చెన్నైలో మరణించారు. ఈయన కుమారులు స్టాలిన్, అలిగిరి, కూతురు కనిమొళి కూడా రాజకీయాలలో ఉన్నారు. స్టాలిన్ ప్రస్తుతం డిఎంకె పార్టీ అధ్యక్షపదవిలో ఉన్నారు.   రాజకీయ ప్రస్థానం: విద్యార్థి దశలోనే జస్టిస్ పార్టీ వారి ప్రసంగాలు విని హిందీ వ్యతిరేక ఉద్యమంలో పాల్గొన్న కరుణానిధి 1957లో తొలిసారిగా కులితలై నుంచి మద్రాసు రాష్ట్ర శాసనసభకు ఎన్నికైనారు. 1962లో తంజావూరు నుంచి, 1967లో సైదాపేట్ నుంచి ఎన్నికై ప్రతిపక్ష డిప్యూటి లీడర్‌గా పనిచేశారు. 1969లో అన్నాదురై మరణం తర్వాత డిఎంకె పార్టీ అధ్యక్ష బాధ్యతలు చేపట్టడమే కాకుండా అదే ఏడాది తొలిసారి ముఖ్యమంత్రి పదవి పొందారు. 1972లో ఎం.జి.రామచంద్రన్ డిఎంకె నుంచి బయటకు వెళ్ళి ఏఐఏడిఎంకె ను స్థాపించడంతో ఈయనకు రామచంద్రన్‌కు మధ్య ముఖ్యమంత్రి పదవికి పోటీ ఏర్పడింది. రామచంద్రన్ మరణం తర్వాత ఏఐడిఎంకె అధ్యక్షపదవి పొందిన జయలలితతో కూడా ఈయనకు ముఖ్యమంత్రి పీఠం పలుమార్లు చేతులుమారింది. మొత్తంపై కరుణానిధి 5 సార్లు ముఖ్యమంత్రి పదవి పొందడమే కాకుండా (తమిళనాడు ముఖ్యమంత్రుల పట్టికకై ఇక్కడ చూడండి) తమిళనాడులో సుధీర్ఘకాలం ముఖ్యమంత్రి పదవి నిర్వహించిన వ్యక్తిగా రికార్డు సృష్టించారు. కుమారుడు స్టాలిన్‌ను ఈయన రాజకీయ వారసుడిగా ప్రకటించారు.  ఇవి కూడా చూడండి: తమిళనాడు ముఖ్యమంత్రుల పట్టిక, తమిళనాడు ప్రముఖులు, ద్రవిడ మున్నేట కజగం, జూన్ 3 (చరిత్రలో ఈ రోజు), ఆగస్టు 7 (చరిత్రలో ఈరోజు), ఎం.స్టాలిన్, కనిమొళి, హోం విభాగాలు: తమిళనాడు ముఖ్యమంత్రులు, తమిళనాడు ప్రముఖులు,  = = = = =