పర్వతనేని ఉపేంద్ర (Parvathaneni Upendra)

జననం జూలై 14, 1936 రంగం జర్నలిస్టు, రాజకీయాలు పదవులు కేంద్రమంత్రి, మరణం నవంబరు 16, 2009 జర్నలిస్టుగా, రచయితగా, రాజకీయ నాయకుడిగా ప్రసిద్ధి చెందిన పర్వతనేని ఉపేంద్ర జూలై 14, 1936న పశ్చిమ గోదావరి జిల్లా దెందులూరు మండలం పోతునూరులో జన్మించారు. ఈయన పూర్తిపేరు ఉపేంద్ర చంద్ర చౌదరి. విద్యార్థిదశలోనే 13వ ఏట స్వగ్రామంలో "విద్యార్థి విజ్ఞాన వికాస మండలిని స్థాపించారు. కళాశాల దశలో ఉన్నప్పుడు ప్రత్యేక ఆంధ్రరాష్ట్ర సత్యాగ్రహంలో పాల్గొన్నారు. 1957లో మద్రాసు విశ్వవిద్యాలయం నుంచి జర్నలిజంలో డిప్లోమా పొంది కొంతకాలం "ది మెయిల్" ఆంగ్ల దినపత్రిక ఎడిటర్‌గా పనిచేశారు. ఆ తర్వాత రైల్వేలో జర్నలిస్టుగా చేరి "ఇండియన్ రైల్వేస్" మాసపత్రిక సంపాదకుడిగా వ్యవహరించారు. 1977లో అప్పటి రైల్వేశాఖ మంత్రి మధుదండావతె కు ప్రత్యేక కార్యదర్శిగా పనిచేశారు. 1982లో తెలుగుదేశం పార్టీ ద్వారా రాజకీయాలలో ప్రవేశించి అంచెలంచెలుగా ఎదిగి కేంద్రమంత్రిగా కూడా పనిచేశారు. ఉపేంద్ర నవంబరు 16, 2009న హైదరాబాదులో మరణించారు. పారిశ్రామికవేత్త మరియు విజయవాడ ఎంపీగా పనిచేసిన లగడపాటి రాజగోపాల్ ఈయన అల్లుడు (కూతురు పద్మశ్రీ భర్త) రాజకీయ ప్రస్థానం: 1982లో ఎన్టీ రామారావు స్థాపించిన తెలుగుదేశం పార్టీ ద్వారా రాజకీయ ప్రవేశం చేసిన ఉపేంద్ర 1983లో తెలుగుదేశం పార్టీ ప్రధాన కార్యదర్శిగా ఎన్నిక కావడమే కాకుండా పార్టీ స్థాపకుడు ఎన్టీ రామారావుకు ప్రత్యేక సలహాదారునిగా పనిచేశారు. 1983లో హిమాయత్ నగర్ ఉప ఎన్నికలో తెలుగుదేశం ఫార్టీ తరఫున పోటీచేసి ఓడిపోయారు. 1984లో తెలుగు దేశం పార్టీ తరఫున రాజ్యసభకు ఎన్నికయ్యారు. విశ్వనాథ్ ప్రతాప్ సింగ్ మంత్రివర్గంలో కేంద్ర సమాచార శాఖ మంత్రిగా పనిచేశారు. 1992లో తెలుగుదేశం పార్టీ నుంచి బహిష్కరణకు గురై కొంత కాలం రాజకీయాలకు దూరంగా ఉన్నారు. 1982-92 కాలపు తన రాజకీయ చరిత్రను "గతం-స్వగతం" పేరుతో గ్రంథస్థం చేశారు. తర్వాత కాంగ్రెస్ పార్తీలో చేరి 1996, 98లలో విజయవాడ నుంచి కాంగ్రెస్ పార్టీ తరఫున లోక్‌సభ ఎన్నికైనారు. 1999లో తెలుగుదేశం ఫార్టీ చేతిలో ఓటమి చెందారు. తర్వాత చిరంజీవి స్థాపించిన ప్రజారాజ్యం పార్టీలో చేరి క్రియాశీలకంగా వ్యవహరించారు. ఇవి కూడా చూడండి: లగడపాటి రాజగోపాల్, గతం-స్వగతం (పుస్తకం), దెందులూరు మండలం,  విజయవాడ లోకసభ నియోజకవర్గం, హోం విభాగాలు: ఆంధ్రప్రదేశ్ రాజకీయ నాయకులు, కేంద్రమంత్రులు, పశ్చిమ గోదావరి జిల్లా ప్రముఖులు,  = = = = =