తమిళనాడు (Tamilnadu)

రాజధాని చెన్నై అధికార భాష తమిళం వైశాల్యం 1,30,058 చకిమీ జనాభా (2011) 7,21,47,030 జిల్లాలు 38 దక్షిణ భారతదేశంలో బంగాళాఖాతం తీరాన ఉన్న రాష్ట్రం తమిళనాడు. కేరళ, కర్ణాటక, ఆంధ్రప్రదేశ్, పుదుచ్చేరిలు దీని సరిహద్దు రాష్ట్రాలు. తమిళనాడుకు ఆగ్నేయాన హిందూ మహాసముద్రంలో శ్రీలంక ద్వీప దేశం ఉంది. తమిళనాడు అధికార భాష తమిళం. ఈ రాష్ట్ర రాజధాని చెన్నై. చెన్నై, కోయంబత్తూరు, కడలూరు, మదురై, తిరుచిరాపల్లి, సేలం, తిరునల్వేలి తమిళనాడు రాష్ట్రంలోని ముఖ్యమైన నగరాలు. ప్రముఖ గణిత శాస్త్రవేత్త శ్రీనివాస రామానుజన్, చెస్ క్రీడాకారుడు విశ్వనాథన్ ఆనంద్, రాజకీయ నాయకులు ఎం.జి.రామచంద్రన్, కరుణానిధి, జయలలిత, సమాయోధుడు మరియు కవి సుబ్రహ్మణ్య భారతి, సంగీత దర్శకుడు, ఆస్కార్ పురస్కార గ్రహీత ఏ.ఆర్.రెహమాన్ ఈ రాష్ట్రానికి చెందిన ప్రముఖులు. భారతదేశ చరిత్రలో ప్రముఖంగా పేరుపొందిన చోళ, చేర, పాండ్య వంశాలు ఈ ప్రాంతాన్ని పాలించారు. పూర్వం మద్రాసు రాష్ట్రంగా పిలువబడిన తమిళనాడులో బృహదీశ్వరాలయం, కంచి, రామేశ్వరం తదితర అధ్యాత్మిక క్షేత్రాలున్నాయి. రాష్ట్ర వైశాల్యం 1,30,058 చకిమీ మరియు 2011 ప్రకారం రాష్ట్ర జనాభా 7,21,47,030. రాష్ట్రంలో 32 జిల్లాలు, 39 లోక్‌సభ స్థానాలు కలవు. భౌగోళికం, సరిహద్దులు: తమిళనాడు 130,058 చదరపు కిలోమీటర్ల వైశాల్యంలో దేశంలో 11వ పెద్ద రాష్ట్రంగా ఉంది. ఈ రాష్ట్రానికి పశ్చిమాన కేరళ, వాయువ్యాన కర్ణాటక, ఉత్తరాన కర్ణాటకతో పాటు ఆంధ్రప్రదేశ్ రాష్ట్రాలు, తూర్పున బంగాళాఖాతం సరిహద్దులుగా ఉన్నాయి.  రాజకీయాలు: ఈ రాష్ట్రంలో ప్రాంతీయ పార్టీలే గత కొన్ని దశాబ్దాలుగా అధికారం చెలాయిస్తున్నాయి. డిఎంకె మరియు ఏఐఏడిఎంకె పార్టీలు ఇక్కడ బలమైన రాజకీయపక్షాలు. కాంగ్రెస్ పార్టీ ఒకప్పుడు అధికారం చెలాయించిన ఇప్పుడు ప్రాంతీయ పార్టీలతో పొత్తు పెట్టుకొనే పరిస్థితి ఉంది. రవాణా సౌకర్యాలు: రాష్ట్రంలోని ప్రముఖ నగరాలు, పట్టణాలను కలుపుతూ 5000 కిలోమీటర్ల పొడవైన 28 జాతీయ రహదారులున్నాయి. చెన్నై నగరం దక్షిణ రైల్వే ప్రధానకేంద్రంగాఉంది. చెన్నై, కోయంబత్తూర్, తిరుచిరాపల్లిలలో అంతర్జాతీయ విమానాశ్రయాలున్నాయి. చెన్నై, ఎన్నోర్ మరియు ట్యుటికోరన్‌లలో మేజర్ ఓడరేవులు కలవు. క్రీడలు: కబడ్డి ఆట ఈ రాష్ట్రంలోనే ఆవిర్భవించింది. ఇది రాష్ట్ర క్రీడగా గుర్తింపు పొందింది. అయిననూ క్రికెట్ ప్రజాదరణ క్రీడగా చెలామణి అవుతోంది. చెన్నైలోని చిదంబరం స్టేడియం అంతర్జాతీయ క్రికెట్ పోటీలకు ఆతిథ్యం ఇచ్చే దేశంలోని ప్రముఖ స్టేడియాలలో ఒకటి. వెంకటరాఘవన్, కృష్ణమాచారి శ్రీకాంత్, లక్ష్మణ్ శివరామకృష్ణన్ తదితరులు భారత క్రికెట్ జట్టుకు ప్రాతినిధ్యం వహించిన ఈ రాష్ట్ర ప్రముఖ క్రీడాకారులు. చెన్నై సూపర్ కింగ్స్ ఐపీఎల్‌లో ప్రముఖ ఫ్రాంఛైజీ మరియు 2 సార్లు విజేత. ప్రముఖ చదరంగ క్రీడాకారుడు, ప్రపంచ చాంపియన్ టైటిల్ సాధించిన విశ్వనాథన్ ఆనంద్, టెన్నిస్ క్రీడాకారులు రామనాథన్ కృష్ణన్, రమేష్ కృష్ణన్, విజయ్ అమృత్‌రాజ్, మహేష్ భూపతి, నిరుపమ వైద్యనాథన్‌లు ఈ రాష్ట్రానికి చెందినవారు. ఇవి కూడా చూడండి: తమిళనాడు గవర్నర్లు, తమిళనాడు ముఖ్యమంత్రులు,  తమిళనాడు జిల్లాలు, తమిళనాడు నగరాలు, పట్టణాలు, తమిళనాడు కాలరేఖ, తమిళనాడు ప్రముఖులు, హోం, విభాగాలు: భారతదేశ రాష్ట్రాలు, తమిళనాడు,  = = = = =