యాలాల మండలం (Yalal Mandal)

జిల్లా	వికారాబాదు జిల్లా
రెవెన్యూ డివిజన్	తాండూరు
అసెంబ్లీ నియోజకవర్గం	తాండూరు
లోకసభ నియోజకవర్గం	చేవెళ్ళ
జనాభా	39451 (2001), 45180 (2011),

యాలాల వికారాబాదు జిల్లాకు చెందిన మండలము. ఈ మండలము తాండూరు రెవెన్యూ డివిజన్, తాండూరు అసెంబ్లీ నియోజకవర్గం, చేవెళ్ళ లోకసభ నియోజకవర్గంలో భాగంగా ఉంది. మండల వ్యవస్థకు పూర్వం ఇది తాండూరు తాలుకాలో భాగంగా ఉండేది. కాగ్నానది మండలం గుండా ప్రవహిస్తోంది. కాకరవేణి, కాగ్నాలు మండలంలోనే సంగమిస్తున్నాయి. 2001 లెక్కల ప్రకారం 39451 జనాభాతో రంగారెడ్డి జిల్లాలో అత్యల్ప జనాభా కల రెండవ మండలంగా ఉంది. 2011 లెక్కల ప్రకారం స్త్రీపురుష నిష్పత్తిలో (1053/వెయ్యి పురుషులకు) ఈ మండలం జిల్లాలో ప్రథమ స్థానంలో ఉంది. మండల విస్తీర్ణం 22453 హెక్టార్లు. జుంటుపల్లి ప్రాజెక్టు, చారిత్రకమైన జుంటుపల్లి రామాలయం మండలంలో ఉన్నాయి. కందులు మండలంలో పండించే ముఖ్యమైన పంట. అక్టోబరు 11, 2016న ఈ మండలం కొత్తగా ఏర్పడిన వికారాబాదు జిల్లాలో చేర్చబడింది.

 

భౌగోళికం, సరిహద్దులు:
ఈ మండలానికి ఉత్తరాన తాండూరు మండలం మరియు పెద్దెముల్ మండలం, తూర్పున ధరూరు మండలం, దక్షిణాన బొంరాస్‌పేట మండలం, నైరుతిన కోడంగల్ మండలం, పశ్చిమాన బషీరాబాదు మండలం సరిహద్దులుగా ఉన్నాయి. మండలం గుండా భీమానది ఉపనది అయిన కాగ్నా మరియు కాకరవేణి నదులు ప్రవహిస్తున్నాయి.

 

చరిత్ర:
యాలాల ప్రాచీన చరిత్రను కల్గియుంది. మండలంలో ప్రాచీన కాలంనాటి పలు ఆలయాలు ఉన్నాయి. ఈ ప్రాంతం గుల్బర్గా జిల్లాలో భాగంగా ఉంటూ సెప్టెంబరు 17, 1948న విమోచనోద్యమం వల్ల భారత యూనియన్‌లో చేరి హైదరాబాదు రాష్ట్రంలో భాగంగా, 1956-2014 కాలంలో ఉమ్మడి ఆంధ్రప్రదేశ్‌లో భాగంగా ఉండి, జూన్ 2, 2014న తెలంగాణ రాష్ట్రంలో భాగమైంది. 1969లో మరియు 2009-14 కాలంలో తెలంగాణ ఉద్యమం ఉధృతంగా సాగింది. 2011లో 42 రోజులపాటు మండలం మొత్తం సకలజనుల సమ్మె జయప్రదమైంది. 1978 వరకు హైదరాబాదు జిల్లాలో ఉండగా ఆగస్టు 15, 1978న కొత్తగా ఏర్పాటుచేసిన రంగారెడ్డి జిల్లాలో భాగంగా ఉంటూ తెలంగాణ అవతరణ అనంతరం జిల్లాల పునర్విభజన తర్వాత వికారాబాదు జిల్లాలో భాగమైంది. అదే సమయంలో మండలకేంద్రం రెవెన్యూ డివిజన్ కేంద్రంగా మారింది.

జనాభా:
2001 లెక్కల ప్రకారం మండల జనాభా 39451. ఇందులో పురుషులు 19537, మహిళలు 19914. 1991 జనాభాతో పోలిస్తే దశాబ్ద కాలంలో 16.45% వృద్ధి సాధించింది. 2001 లెక్కల ప్రకారం రంగారెడ్డి జిల్లాలో జనాభాలో ఇది 36వ స్థానంలో ఉంది. జిల్లాలో అత్యల్ప జనాభా కల రెండవ మండలం ఇది.
2011 లెక్కల ప్రకారం మండల జనాభా 45180. ఇందులో పురుషులు 22007, మహిళలు 23173. అక్షరాస్యుల సంఖ్య 22116. స్త్రీపురుష నిష్పత్తిలో (1053/వెయ్యి పురుషులకు) ఈ మండలం జిల్లాలో ప్రథమ స్థానంలో ఉంది.

రాజకీయాలు:
ఈ మండలం తాండూరు అసెంబ్లీ నియోజకవర్గం, చేవెళ్ళ లోక్‌సభ నియోజకవర్గంలో భాగము. 2019 ప్రాదేశిక ఎన్నికలలో ఎంపీపీగా కాంగ్రెస్ పార్టీకి చెందిన బాలేశ్వర్ గుప్తా ఎన్నికయ్యారు.

అక్టోబరు 11, 2016కు ముందు
రంగారెడ్డి జిల్లాలో యాలాల మండల స్థానం

హోం, విభాగాలు: వికారాబాదు జిల్లా మండలాలు, తాండూరు అసెంబ్లీ నియోజకవర్గం, వికారాబాదు రెవెన్యూ డివిజన్,

 = = = = =